ШТУТГАРТ. KAZINFORM - Қазақстанның бірінші, әлемнің 4-ракеткасы Елена Рыбакина Штутгарт (Германия) WTA 500 турнирінің жартылай финалына шықты.
Қазақстандық теннисші ширек финалда әлемнің 14-ракеткасы, Италия өкілі Ясмин Паолинимен кездесті.
Осыған дейін қарсыластар өзара үш рет тоқайласып, соның екеуінде италиялық спортшының жолы болған.
Бұл жолы бірінші партияда Рыбакина 6:3 есебімен басым түсті.
Екіншісінде Паолини қарымта қайырды - 7:5.
Соңғы, шешуші сетте Рыбакина жеңісті жұлып алды - 6:3.
Екі сағат 10 минутқа созылған тартысты матчта Елена 7 эйспен бірге 15 брейк-пойнттың бесеуін пайдаланды. Ясмин 4 брейкпен (7 брейк-пойнт) көзге түсті.
Елена Рыбакина финалға шығу үшін әлемнің 1-ракеткасы, «Үлкен дулыға» турнирінің төрт мәрте чемпионы, поляк қызы Ига Швентек немесе рейтингіде 303-орындағы ұлыбританиялық, 2021 жылғы АҚШ чемпионатының жеңімпазы Эмма Радуканумен таласады.
Еске сала кетейік, бұдан бұрын Елена Рыбакинаның Штутгарт турнирінің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).