АСТАНА. KAZINFORM – Қазақстанның бірінші, әлемнің 12-ракеткасы Елена Рыбакина Страсбург (Франция) WTA турнирінің жартылай финалына жолдама алды.
Қазақстандық теннисші ширек финалда әлемнің 33-ракеткасы, Польша өкілі Магда Линетпен шеберлік байқасты.
Осыған дейінгі өзара екі кездесуде де Рыбакина жеңген еді. Бұл жолы Елена бірінші партияны брейкпен тәмамдады – 7:5. Екінші сетте де бір брейк жеткілікті болды – 6:3.
Бір сағат 40 минутқа созылған бәсеке барысында Рыбакина 6 эйспен бірге 9 брейк-пойнттың екеуін пайдаланды. Линетт 6 эйспен шектелді.
Енді Елена Рыбакина финалға шығу үшін әлемнің 9-ракеткасы, америкалық Эмма Наварро немесе рейтингіде 23-сатыда тұрған бразилиялық теннисші Беатрис Хаддад-Майяның біреуімен таласады.
Еске сала кетейік, бұдан бұрын Рыбакинаның Страсбург турнирінің ширек финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).