Қазақстанның бірінші, әлемнің 4-ракеткасы Елена Рыбакинаның жаңа маусымды қай жарыстан бастайтыны белгілі болды, деп хабарлайды Kazinform.
Е.Рыбакина Әйелдер теннисі қауымдастығының (WTA) жаңа маусымында Брисбен (Аустралия) турниріне қатысу туралы шешім қабылдады.
Жарысты ұйымдастырушылардан түскен ақпаратқа қарағанда, Брисбен додасына әлемнің 2-ракеткасы, Беларусь өкілі Арина Соболенко да қатыспақшы.
WTA 500 санатындағы Brisbane International турнирі 31 желтоқсан – 7 қаңтар аралығында өтеді. Бұл Australian Open қарсаңындағы додалардың бірі болмақ.
Биыл Елена Рыбакинаның Аустралия ашық чемпионатының финалына дейін жетіп, Индиан-Уэллс (АҚШ) және Рим (Италия) WTA 1000 турнирлерінің чемпионы атанғаны белгілі.
Еске сала кетейік, бұдан бұрын Қазақстан теннисшілерінің әлемдік рейтингі жарияланғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).