НҰР-СҰЛТАН. ҚазАқпарат - Қазақстанның бірінші, әлемнің 25-ракеткасы А ҚШ ашық чемпионатының екінші айналымына шыға алмады, деп хабарлайды ҚазАқпарат тілшісі.
Қазақстандық теннисші алғашқы айналымда дүниежүзілік рейтингте 131-орында тұрған франциялық Клара Бюрельмен шеберлік байқасты.
Қарсыластар осыған дейін кездеспеген болатын.
Бірінші партияда франциялық спортшы басым түсті - 6:4.
Клара екінші сетте бірден 2:0 есебімен алға шықты. Ақыры сол қарқынынан жаңылған жоқ - 6:4.
Осылайша, Е.Рыбакина бәсекенің фавориті болғанына қарамастан, күтпеген жерден қарсыласына есе жіберді.
Сағат жарымға созылған матчта Е.Рыбакина 4 эйс жасап, 9 брейк-пойнттың біреуін ғана пайдаланды. Франциялық спортшы 4 эйспен бірге 3 брейк-пойнтты түгел өз есебіне жазды.
К.Бюрель екінші айналымда бельгиялық Элисон Ван Эйтванк немесе америкалық Винус Уильямстің біреуімен кортқа шығады.
Еске сала кетейік, бұдан бұрын Александр Бубликтің АҚШ ашық чемпионатының екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).