АСТАНА. ҚазАқпарат – Қазақстанның бірінші, әлемнің 3-ракеткасы Елена Рыбакина Берлин (Германия) WTA 500 турнирінің екінші айналымына шықты, деп хабарлайды ҚазАқпарат тілшісі.
Жарыстың екінші ракеткасы болып тіркелген қазақстандық теннисші алғашқы айналымда дүниежүзілік рейтингте 139-орында тұрған, іріктеу сайысы жеңімпаздарының бірі, ресейлік, 20 жастағы Полина Кудерметовамен кездесті.
Бірінші партияда есеп 5:4 болған мезетте Елена брейк жасай білді – 6:4.
Екінші сетте Рыбакина 3:0 есебімен алға кетті. Ақыры матчты тағы бір брейкпен түйіндеді – 6:2.
Бір сағаттан астам уақытқа созылған матчта Е.Рыбакина 9 эйс жасап, 11 брейк-пойнттың үшеуін пайдаланды. Полина Кудерметова 9 эйспен көзге түсті.
Бір айта кететін жайт, Полинаның апасы, әлемнің 13-ракеткасы Вероника Кудерметова да Берлинде бақ сынауда.
Е.Рыбакина ширек финалға шығу үшін әлемнің 23-ракеткасы, хорватиялық Донна Векичпен таласады. Д.Векич бастапқы кездесуінде рейтингте 43-сатыдағы ресейлік Варвара Грачеваны ұтты – 6:3, 6:2.
Еске сала кетейік, бұдан бұрын қазақстандық жас теннисшілердің халықаралық турнирлерде табысты өнер көрсеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).