АСТАНА. ҚазАқпарат – Аустралия ашық чемпионатының жартылай финалына шыққан Қазақстанның бірінші ракеткасы Елена Рыбакина қазақстандық теннисшілерден алғаш рет жекелей сында әлемдік рейтингіде ТОП-10-ға енуге жақын тұр, деп хабарлайды ҚазАқпарат тілшісі.
Дәл қазіргі сәтте қазақстандық теннисші 25-тен 12-орынға көтерілді.
Ол бұдан бір жыл бұрын 12-сатыға шыққан еді, яғни үздік көрсеткішін қайталап отыр.
Егер Е.Рыбакина финалға шықса, онда үздік ондыққа кіреді. Бұрын-соңды қазақстандық теннисшілер мұндай биікке шығып көрген емес. Негізі өзі жеңімпаз атанған Уимблдон турнирінің рейтингілік ұпайлары есептелгенде, Елена өткен жылы-ақ үздік ондыққа енетін еді.
Еске сала кетейік, бұдан бұрын Аустралия чемпионатында Елена Рыбакинаның алғаш рет жартылай финалға шыққанын жазған едік.
Фото: Сhampionat.com
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).