НҰР-СҰЛТАН. ҚазАқпарат – Қазақстандық Елена Рыбакина Қытайдағы Шэньчжэнь турнирінің финалына шықты, деп хабарлайды ҚазАқпарат тілшісі.
Осы аптадағы табысы арқасында Қазақстанның бірінші ракеткасы атанып үлгерген Е.Рыбакина жартылай финалда рейтингте 66-орында тұрған чехиялық Кристина Плишковамен кездесті.
Ойын тізгінін бірден қолға алған қазақстандық теннисші бірінші партияда 6:2 есебімен басым түсті.
Екінші сетте есеп 6:5 болған мезетте Елена матчты брейкпен түйіндеді – 7:5.
Бәсеке 1 сағат 13 минутқа созылды.
Е.Рыбакина жүлде қоры 775 мың АҚШ долларына бағаланған жарыстың финалында әлемнің 35-інші, осы турнирдің 5-ракеткасы, бұрынғы отандасы, ресейлік Екатерина Александровамен бас жүлдені сарапқа салады. Ол жартылай финалда испаниялық Гарбинье Мугурусаны 6:4, 6:3 есебімен сүріндірді. Испаниялық спортшы ширек финалда қазақстандық Зарина Диясты жеңіп кеткен болатын.
Еске сала кетейік, бұдан бұрын Е.Рыбакинаның Шэньчжэнь турнирінің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).