АСТАНА. ҚазАқпарат – Қазақстанның бірінші, әлемнің 25-ракеткасы Елена Рыбакина Порторож (Словения) WTA 250 турнирінің финалына шықты, деп хабарлайды ҚазАқпарат тілшісі.
Жарыстың үшінші ракеткасы болып тіркелген қазақстандық теннисші жартылай финалда дүниежүзілік рейтингіде 65-орында тұрған румыниялық Ана Богданмен кездесті.
Е.Рыбакина қарсыласын айқын басымдықпен ұтты – 6:1, 6:1.
Бір сағаттан астам уақытқа созылған бәсеке барысында Елена 5 эйс жасап, 11 брейк-пойнттың бесеуін пайдаланды.
Қазақстандық теннисші финалда әлемнің 82-ракеткасы, чехиялық Катержина Синякова немесе рейтингіде 213-сатыдағы германиялық Анна-Лена Фридзамның біреуімен бас жүлдені сарапқа салады.
Бұған дейін Е.Рыбакина сегіз рет WTA жарыстарының финалына шығып, соның екеуінде жеңіске жеткен еді. Бұл – тоғызыншы финалы.
Еске сала кетейік, бұдан бұрын қазақстандық жасөспірім теннисшілердің алғаш рет Азия чемпионы атанғанын жазған болатынбыз.
Сондай-ақ Анна Данилина Чехиядағы жарыстың жеңімпазы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).