НҰР-СҰЛТАН. ҚазАқпарат - Қазақстанның бірінші, әлемнің 25-ракеткасы Елена Рыбакина Порторож (Словения) WTA 250 жарысын жеңіспен бастады, деп хабарлайды ҚазАқпарат тілшісі.
Осы доданың үшінші ракеткасы болып тіркелген қазақстандық теннисші бастапқы кездесуін дүниежүзілік рейтингте 173-орында тұрған германиялық Лаура Зигемундпен өткізді.
Бірінші партияда неміс спортшысы тай-брейкте сәтті ойнады - 7:6 (7:4).
Екіншісінде Елена есе қайырды - 6:4.
Шешуші, үшінші сетте Е.Рыбакина жеңісті жұлып алды - 7:6 (10:8).
Үш сағат 23 минутқа созылған тартысты бәсеке барысында қазақстандық теннисші 15 эйс жасап, 19 брейк-пойнттың бесеуін пайдалана білді. Қарсыласы 4 брейктен аса алмады.
Е.Рыбакина екінші айналымда әлемнің 66-ракеткасы, чехиялық Тереза Мартинцовамен шеберлік байқасады. Ол рейтингіде 85-сатыдағы ұлыбританиялық Хэрриет Дартты ұтты - 0:6, 6:4, 6:1.
Аталмыш жарыс 18 қыркүйекте мәреге жетеді.
Еске сала кетейік, бұдан бұрын теннистен Дэвис кубогында Қазақстан Нидерланды командасымен кездесетінін жазған болатынбыз.
Сондай-ақ қазақстандық теннисші Ыстанбұл турнирінің екінші айналымына шықты.
Фото: Sports.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).