Елімізде Президенттік жастар кадр резервіне іріктеу басталады

АСТАНА. ҚазАқпарат – Мемлекеттік басқару жүйесі үшін талантты жастарды анықтау және тарту мақсатында Президенттік жастар кадр резервіне кезекті үшінші іріктеу жоспарланып отыр, деп хабарлайды ҚазАқпарат.

Денсаулық сақтау министрлігінің мәліметінше, іріктеуге өтінімдерді қабылдау 1 қыркүйектен бастап pkrezerv.gov.kz сайтында қолжетімді. Өтінімдер 30 қыркүйекке дейін қабылданады.

Іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, қазақ тілін меңгерген (В1 деңгейінен төмен емес) Қазақстан Республикасының азаматы қатыса алады.

Биыл іріктеу келесі бағыттар бойынша жүргізіледі:

• инфрақұрылымды, өнеркәсіпті дамыту және сауда саясаты;
• агроөнеркәсіптік кешен және қоршаған ортаны қорғау;
• - сыртқы саясат және инвестициялар;
• экономикалық және қаржылық саясат;
• - цифрландыру;
• - әлеуметтік саясат және азаматтық қоғам.

Іріктеу 6 кезең бойынша өткізіледі:

• құжаттарды қабылдау;
• - мәтіндік және сандық ақпаратпен жұмыс істеу қабілетін бағалау;
• - ситуациялық тапсырмаларды шешуді бағалау;
• - құзыреттерді бағалау (assessment center және hr-сұхбат);
• - сарапшылық комиссияда әңгімелесу;
• - ұлттық комиссия отырысы.

Іріктеу қорытындысы бойынша 50 кандидат резервке алынады. Жеңімпаздар ағымдағы жылғы желтоқсанда жарияланады.

Президенттік жастар кадр резерві үшінші іріктеуінің ерекшеліктері туралы жазған болатынбыз.