Еліміздегі бөлшек сауда көлемі 20,8% өсті

АСТАНА. ҚазАқпарат – Биыл қаңтарда Қазақстандағы бөлшек сауда көлемі 1 059,1 млрд теңгеге жетті. Бұл өткен жылдың тиісті кезеңімен салыстырғанда 20,8%-ға артық. Ал саудамен айналысатын кәсіпорындардың тауарларды бөлшек саудада өткізу көлемі 32,6%-ға өсті. Бұл туралы ҚазАқпарат тілшісі Ұлттық статистика бюросына сілтеме жасап хабарлайды.

Бюро дерегінше, азық-түлік тауарларының бөлшек саудадағы жалпы үлесі - 27,6%, ал өзге де тауар түрлері бойынша - 72,4%.

Мына тауар түрлерін сату бойынша ең көп өсім тіркелді:

- фармацевтикалық тауарлар;

- мотор отыны;

- автомобиль, автомобиль бөлшектері;

- нан-тоқаш, ұннан жасалған және кондитерлік өнімдер;

- тоқыма және шұлық бұйымдары, киім;

- компьютерлер;

- косметикалық тауарлар мен жеке гигиена құралдары.

Қоса кетейік, бұған дейін Ұлттық статистика бюросы биыл жалдамалы пәтер құны 2,5%-ға төмендегенін мәлімдеп еді.