Еліміздегі үшінші алып ту Түркістан төрінде желбіреді
Ту тұғырдың биіктігі - 62,5 метр. Ал, байрақтың ені 12 метр болса, ұзындығы 24 метр. Рәміздер алаңның салтанатты ашылуына облыс әкімі Жансейіт Түймебаев қатысты.
«Елбасымыз Н.Назарбаевтың «Тəуелсіздік - Алтын күмбез дейтін болсақ, сол күмбезді тіреп тұрған төрт белгі - рəміздеріміз бар. Оның біріншісі - Елтаңба, екіншісі - Əнұран, үшіншісі - Көк байрақ, төртіншісі - қазақ тілі» деген сөзі бар. Сондықтан Егеменді еліміздің қасиетті нышандарын қадірлеу - Қазақстанды - Отаным деп есептейтін әрбір азаматтың парызы деп есептеймін. Рәміздер - біздің ұлттық арымыз бен намысымыз. Ендеше бүгінгі ашылып отырған «Рәміздер алаңына» құрметпен қарап, намысымызды қорғай білейік дегім келеді», - деді облыс әкімі.
Бекзат Саттарханов даңғылының бойында салынған алаңда Қазақстан Республикасының Мемлекеттік рәміздері көрініс тапқан және елдік мұратты меңзеген Елбасы мен қазақ елі қайраткерлерінің қанатты сөздері жазылған арнайы тас тақталар сап түзеген.
Нысанның құрылысын «Түркістан Жарық Тазалық» ЖШС жүргізген. Рәміздер алаңын салуға жергілікті бюджеттен 230 миллион теңге көлемінде қаржы бөлініп, сол ақша толығымен игеріліп, абаттандыру жұмыстары жүргізілді. Онда түрлі шағын сәулет нысандары мен су бұрқағы, орындықтар, гүлзарлар орнатылып, декоративті ағаштар отырғызылған.