АСТАНА. ҚазАқпарат - Еліміздің футбол маусымы 3 наурыз күнгі Қазақстан суперкубогы ойынымен басталады. Бұл Астана қаласында өткен Қазақстан кәсіпқой футбол лигасының жалпы жиынында белгілі болды, деп хабарлайды ҚазАқпарат Қазақстан Кәсіпқой футбол лигасына сілтеме жасап.
Естеріңізге сала кетелік, аталмыш ойын «Астана» және «Қайрат» командаларының арасында болады.
Кәсіпқой футбол лигасының жалпы жиынында Премьер-лига ойындарының күнтізбесі де анықталды. Футболдан 2019 жылғы Қазақстан біріншілігінің алғашқы туры 10-11 наурыз күндері ойналады.
Сондай-ақ, отандық клуб басшылары белгілі футболшы Серік Жейлітбаевты еске түсіруге арналған жыл сайынғы сыйлықтың иегерін анықтады. 2018 жылдың қорытындысымен ол сыйлыққа Қызылорданың «Қайсар» командасының жартылай қорғаушысы Мақсат Байжанов лайық деп танылды.
Жалпы жиын барысында 2019 жылғы маусымдағы жарыстардың ресми добы бекітілді. Биыл қазақстандық командалар Adidas компаниясының добымен ойнайды. Сонымен қатар, Conext 19 добы 2020 жылғы Еуропа Чемпионатының іріктеу кезеңнің ресми добы саналады.
Бұдан бұрын футболдан Қазақстан мен Молдова құрамалары 21 наурызда кездесетінін хабарлаған едік.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.