«Биыл Астана қаласының 25 жылдығы аталып өтті. Менің де елордаға келіп, сол кездегі музыка академиясына түсіп, өнер жолымды бастағаныма 25 жыл толды. Соған орай халқымыздың рухани байлығы – күй өнерін құрметтеп, тебірене тыңдайтын жұртшылыққа жаңа туындыларымды тарту еткелі тұрмын», - дейді Нұрлан Бекенов.
Концерттің жаңалықтары өте мол болмақ. Жетісудан шыққан атақты аға сұлтан Тезек төренің «Абылайдың ақ иығы» атты күйі алғаш рет орындалады.
Нұрлан Бекеновтің «Таубай толғауы немесе Ақын арманы» атты күйін қазақ оркестрі орындайды. Бұл күй Атырау өңірінде құрылыс саласында еңбек етіп жүрсе де, өмірін өнермен байланыстырып, ақын ретінде аты шыққан Таубай Сақтағанұлына арналған. Сондай-ақ осы кеште Т.Сақтағанұлының сөзіне жазылған Н.Бекеновтің «Жастық шақ қайтып келмейді» әнін Светлана Айтбаева алғаш рет көрермен назарына ұсынады.
Нұрлан Бекеновтің Қаблиса жырауға, Орақты батырға және Шыңғыс ханның оң қолы болған Мұқали батырға арналған күй дастандары орындалады.
Н.Бекеновтің «Алты Алаштың баласы» атты жаңа әнін «Балдәурен» балалар хоры шырқайды. Сөзін жазған Айбатыр Сейтақ. Бұдан басқа да көптеген туындылар бар.
Өнер ұжымын сахнаға аталған қазақ оркестрінің көркемдік жетекшісі және бас дирижері, Қазақстанның еңбек сіңірген қайраткері, профессор Айтқали Жайымов бастап шығады.
Композитордың шығармашылық кешінде Халық әртісі Алтынбек Қоразбаев, күйші Секен Тұрысбек, Қазақстанның еңбек сіңірген қайраткері Серік Еркімбеков, Тәттімбет атындағы академиялық қазақ халық аспаптары оркестрінің бас дирижері Ерлан Бақтыгерей, әншілер Зағипа Иманғазиева мен Гүлмира Сарина, «Гүлмаржан» дуэті және басқа да дарын иелері өнер көрсетеді деп күтілуде.