Елімізде ерекше балаларды қолдауға арналған заң әзірленеді – құрылтай

АСТАНА. KAZINFORM – Мемлекет басшысы жыл соңына дейін ерекше балаларға жан-жақты қолдау көрсететін заң әзірлеуді тапсырды.

- Бұдан бөлек, әрбір облыс орталығында ерекше қажеттілігі бар, соның ішінде аутизмге шалдыққан балаларды оңалту және дамыту орталықтарын құру керек. Өкінішке қарай, дүние жүзінде осындай диагнозы бар балалардың саны жылдам өсіп барады, - деді Қасым-Жомарт Тоқаев ұлттық құрылтайда.

Осы орайда Президент аталған жағдайдың Қазақстанға да қатысы барын айтты.

- Демеушілердің және «Қазақстан халқына» қорының көмегімен осы маңызды жұмыста белгілі бір ілгерілеу бар. Үкімет пен әкімдер бұл шаруаны жандандыруы қажет. Қазақстанда ерекше қажеттілігі бар әрбір баланың толыққанды білім алуға мүмкіндігі болуы керек. Бұл – өте маңызды мәселе. Сондықтан жыл соңына дейін осындай балаларға жан-жақты қолдау көрсету ісін реттейтін жаңа заң әзірлеу керек, - дейді Мемлекет басшысы.

Сондай-ақ Қасым-Жомарт Тоқаев ел өңірлерінде өтетін түрлі мәдени-туристік іс-шараларды бренд ретінде қалыптастыру қажеттігін айтты. 

Одан бөлек, Президент шекаралық елді мекендердің бүгінгі ахуалына тоқталды.