Елімізде уақтылы жаңартылмаған базар иелеріне айыппұл салынады

АСТАНА. KAZINFORM – Келер жылдан бастап базарды жаңартуға қатысты ұсыным мен ескертулерді елемеген базар иелеріне айыппұл салына бастайды. Бұл туралы Сауда және интеграция министрлігі сауда комитетінің төрағасы Айдар Әбілдабеков мәлім етті.

- Базарларды жаңғырту жұмысы алдымен бизнестің әлеуметтік жауапкершілігі екенін ескеру қажет. Жаңарту тек сатып алушылар үшін ғана емес, сатушылар үшін де қолайлы және қауіпсіз жағдай жасайды. Жергілікті әкімдіктер мен аумақтық сауда департаменттері жаңғыртуды уақтылы әрі сапалы жүргізу және жаңғыртуға кедергі келтіретін проблемаларды жою бойынша жұмысты күшейтуі қажет, - деді Айдар Әбілдабеков Орталық коммуникациялар қызметі алаңында өткен баспасөз мәслихатында. 

Осы орайда Сауда комитетінің басшысы базар иелеріне жауапкершілік жүктелетінін айтты. 

- 2026 жылғы 1 қаңтардан бастап әкімшілік құқық бұзушылық туралы заңнамаға сәйкес, базарды белгіленген мерзімде жаңғыртуды қамтамасыз етпеген сауда базарларының иелерін әкімшілік жауапкершілікке тарту жоспарланып отыр, - дейді ол. 

Сондай-ақ, спикер алдымен базар иелеріне ескерту жасалып, ұсыным берілетінін айтты, егер ескерту еленбеген жағдайда 300 АЕК ( 1 179 600 теңге) көлемінде айыппұл салынады. Мәселе айыппұлмен шешілмеген жағдайда іс сотқа жіберіледі. 

Айта кетейік, биыл елімізде 100 базар жаңартылады.  Алдымен Сауда және интеграция министрлігінің өкілдері барлық базарды аралап, тексеріп шығады. 

Еске сала кетсек, жыл басында Үкімет басшысы бүкіл сауда қызметін, оның ішінде базарлар мен үй маңындағы шағын дүкендердің қызметін цифрландыру бойынша нақты ұсыныстар мен шаралар әзірлеу керектігін айтқан еді.