«Тасқын су кезеңінде Ақмола, Ақтөбе, Атырау, Батыс Қазақстан, Қарағанды, Қостанай, Солтүстік Қазақстан, Шығыс Қазақстан, Павлодар, Ұлытау және Абай облыстарында су объектілерінің жай-күйіне бақылау күшейтілді. 2024 жылдың өткен кезеңінде I санаттағы ашық су айдындарынан санитарлық-экологиялық мониторинг шеңберінде микробиологиялық көрсеткіштерге 1077 сынама алынды. Оның ішінде 71 (6,6%) сынама сәйкес емес, санитарлық-химиялық көрсеткіштерге 998 су сынамасы алынды, оның ішінде 95 сынама (9,5%) сәйкес келмейді», - деп жауап берді министрлік Kazinform агенттігінің ресми сауалына.
Сондай-ақ, II санаттағы ашық су айдындарынан микробиологиялық көрсеткіштерге 1258 сынама алынған. Оның ішінде 23-і (1,8%) сәйкес емес, ал санитарлық-химиялық көрсеткіштер бойынша алынған 1189 су сынамасының 61-і (5,1%) сәйкес болмай шыққан.
«Қазақстан Республикасының халық денсаулығы және денсаулық сақтау жүйесі туралы кодексінің 114-бабына сәйкес халықтың санитарлық-эпидемиологиялық саламаттылығы саласындағы уәкілетті орган санитариялық-эпидемиологиялық бақылауға және қадағалауға жататын объектілер мен өнімдерге, қоршаған орта объектілеріне (топырақ, су, ауа) қатысты санитариялық-эпидемиологиялық мониторинг жүргізеді. Қазақстан Республикасының Денсаулық сақтау министрінің 2020 жылғы 13 қарашадағы ҚР ДСМ-193/2020 бұйрығын орындау үшін комитеттің аумақтық бөлімшелері су объектілерінің жай-күйіне, атап айтқанда I және II санаттағы су айдындарына санитарлық-экологиялық мониторинг жүргізеді», - делінген сауал жауабында.