Елорда іргесіндегі елді мекендерде қанша халық тұрады

АСТАНА. ҚазАқпарат – Елордадан 30 шақырым радиуста 39 елді мекен бар. Бұл туралы «Астана бас жоспары» ғылыми-зерттеу жобалау институты» ЖШС директорының орынбасары Серік Әбдірахманов айтты, деп хабарлайды ҚазАқпарат тілшісі.

«Елордадан 30 шақырым радиуста болжамды халық саны 283 мың адамды құрайтын 39 елді мекен орналасқан және маятниктік көші-қон деңгейі – 85 мың адам. Демек, қалаға күн сайын 85 мың адам келіп, кетеді. Астанадан 60 шақырым аймақта 83 мың адам тұратын 50 елді мекен бар. Маятниктік көші-қон деңгейі жылына 11 мың адамды құрайды», - деді бүгін қоғамдық талқылау кезінде «Астана қаласының 2035 жылға дейінгі бас жоспарының» жаңа жобасын таныстырған Серік Әбдірахманов.

Оның дерегінше, 60 шақырым аймақтан күн сайынғы жалпы көші-қон 96 мың адамға жетеді.

«Маятниктік көші-қон жағдайын жақсарту үшін жобалық шешімдерге сәйкес Астана аглеомерациясы аймағын қатар дамыту, қосымша жұмыс орындарын құру, өмір сапасын жақсарту қажет», - деді С.Әбдірахманов.

Бұған дейін «Астана қаласының 2035 жылға дейінгі бас жоспарының» жаңа жобасы бойынша қоғамдық талқылау өткенін жазған едік.