НҰР-СҰЛТАН. ҚазАқпарат – Физика-математика бағытындағы Назарбаев Зияткерлік мектебінің жүздеген оқушысы қатысқан «Ең ауқымды домбыра сабағын» Гиннес рекордтар кітабына енгізу жоспарланып отыр. Білім мекемесі биылғы оқу жылын осы сабақпен аяқтады, деп хабарлайды ҚазАқпарат мектептің әлеуметтік желідегі парақшасына сілтеме жасап.
«Елордадағы физика-математика бағытындағы Зияткерлік мектеп оқушылары бүкіл әлемге біздің еліміз бен мәдениетімізді, халықтың жаны деп атауға болатын басты музыкалық аспапты таныстырды. Нағыз қазақ – домбыра екенін бәріміз жақсы білеміз, сондықтан бүгінгі күнді тарихи деп атауға болады»
, – дейді «Назарбаев Зияткерлік мектептері» ДББҰ Басқарма басшысы Күләш Шәмшидинова.
Айтуынша, Гиннесс рекордтар кітабына ұсынылған сабақты бақылауға арнайы бақылаушылар мен стюардтар, бұқаралық ақпарат құрал өкілдері қатысқан.
Guinness World Records (GWR) кітабына өтінім 2021 жылдың желтоқсанында берілген. Талап бойынша сабақты 25-тен астам стюард пен 2 куәгер бақылауы тиіс. Әр 50 қатысушыға бір тәуелсіз стюардтан келеді. Ол нақты топты бақылап, рекорд аймағынан шыққан немесе қажетті іс-әрекетті атқармаған қатысушыны тіркейді. Ал, куәгерлер GWR сенімді тұлғалары ретінде рекордтың орнатылуын растайды.
Бұған дейін елордадағы мектептердің бірінде «Ең ауқымды домбыра сабағы» өткені хабарланған еді.
Гүлнұр Ғазизқызы
Әл-Фараби атындағы ҚазҰУ журналистика факультетінің түлегі. Еңбек жолын «Қазақ әдебиеті», «Сақшы» газеттерінен бастаған. «Дала мен Қала» республикалық қоғамдық-саяси апталығында тілші, жауапты хатшы болып істеді. «Қазақстан-Ақтау» телеарнасының тілшісі, «Қазақстан» Ұлттық арнасының Маңғыстау облысындағы меншікті тілшісі, Маңғыстау облысы әкімі баспасөз қызметінің бас маманы, «Қазақстан» РТРК» АҚ Маңғыстау облыстық филиалы директорының орынбасары – бас редакторы болды.
Ақпарат саласының үздігі.
«ҚР Президенті телерадиокешенінде» 2022 жылғы 1 сәуірден бастап істейді. Kazinform халықаралық ақпарат агенттігі басқарушы директорының орынбасары – қазақ редакциясының бас редакторы.