Елордада өтіп жатқан Білім саласы қызметкерлерінің республикалық тамыз кеңесі аясында БАҚ өкілдері Қасымхан Сенғазиевтен: «Биыл әлеуметтік желіде Астанадағы мектептерде бір сыныпта 52 бала отыруы мүмкін деген ақпарат тарады. Қазір орташа есеппен қаладағы мектептерде бір сынып қанша бала отырады?», - деп сұраған еді.
«Астанадағы мектептерде орын тапшылығы мәселесінің өзекті екені белгілі. Қазіргі таңда қалада 26 мың оқушыға орын жетпейді. 8 мектеп 3 ауысымда оқиды. 18 мектепте оқушылар шамадан тыс білім алады. Бір сыныпта 52 бала оқиды деген дерек жоқ. Елордадағы мектептерде бір сыныпта 30-34 баладан, ал үш ауысымды мектептерде 35-36 баладан білім алады», - деп жауап берді басқарма басшысы.