Елордада 15 мыңға жуық бала тегін шығармашылық үйірмелерге барып жүр

НҰР-СҰЛТАН. ҚазАқпарат – Нұр-Сұлтан қаласында 45 түрлі үйірме жұмыс істейді. Және оған 15 мыңға жуық бала тегін қатысып жатыр. Бұл туралы Нұр-Сұлтан қалалық мәдениет басқармасы мәдени-көркем іс-шараларды ұйымдастыру бөлімінің басшысы Салтанат Муксимова мәлім етті, деп хабарлайды ҚазАқпарат тілшісі.

«Мемлекет басшысы өткен жылғы жолдауында балаларды бұқаралық спортқа белсенді тарту, спорт секцияларын ашу, балаларға арналған үйірмелердің жұмысын жандандыру міндетін қойған еді. Осы орайда еліміздің мәдениет туралы заңына тиісті өзгерістер енгізіліп, Президент тапсырмасы жүзеге асып жатыр. Нұр-Сұлтан қаласында мемлекеттік шығармашылық үйірмелерден бөлек, спорт секциялары да бар. Бүгінде елордада уәкілетті органдар бекіткен 59 шығармашылық үйірме түрі бар. Соның 45-і жұмыс істеп тұр», - деді Салтанат Муксимова елорда әкімдігінде онлайн өткен баспасөз мәслихатында.

Оның айтуынша, бүгінде елордада 15 мыңға жуық бала шығармашылық үйірмелерге тегін қатысып жүр.

«Балалар мен жасөспірімдерге арналған шығармашылық үйірмелер негізінен Бейбітшілік және келісім сарайы мен Тәуелсіздік сарайында ұйымдастырылуда. Балалар үшін есігі әрдайым ашық. Бұрын ата-аналар балаларын үйірмеге ақылы қатыстырса, ендігі уақытта жергілікті бюджеттен қаражат бөлініп, шығармашылық үйірмелер мен спорт секцияларына балалар тегін қатыса алады», - дейді ол.

Сондай-ақ, спикер балалар мен жасөспірімдер арасында бұқаралық спорт пен шығармашылық үйірмені ұйымдастыру, насихаттауға құзырлы орган ретінде мәдениет және спорт министрлігі жауапты екенін еске салды.