Елордада алғашқы қоңырау соғылды
АСТАНА. KAZINFORM — Бүгін елімізде білім күніне орай барлық мектепте салтанатты іс-шара өтті.
Астанадағы біз барған № 79 мектеп лицейде 3397 оқушы білім алып жатыр.
Биыл 1 сыныпқа 287 бүлдіршін қабылданды.
Салтанатты іс-шара мемлекеттік туды шығарып, әнұранды орындаудан басталды.
Одан әрі 1 сынып оқушылары сап түзеді.
Шара барысында ән айтылып, тақпақ оқылды және мектеп табалдырығын аттаған балаларға әліппе таратылды.
— Құрметті қонақтар, ұстаздар мен оқушылар сіздерді білім күнімен шын жүректен құттықтаймын. Құрметті бүлдіршіндер бүгін сіздер үшін ерекше күн, алғаш мектеп табалдырығын аттап, білім әлеміне қадам басып отырсыздар. Құрметті ата-аналар, бүгін сіздермен бірге балаларыңызда жаңа өмірге қадам басып отыр, алдағы уақытта олар білім алып, өсіп жетіліп сіздердің үмітті ақтайды деп сенемін. Балалардың әр қадамына қуанып, олардың жетістігіне ортақтасып жүре беріңіздер. Құрметті ұстаздар, жаңа оқу жылы сіздер үшін шығармашылық табысқа, жаңа жетістіктер мен қуанышты сәтке толы болсын. Сіздердің еңбек ұрпақ тәрбиесінің негізі, болашақтың бастауы. Шәкірттеріңіздің әр жетістігі сіздердің қажырлы еңбегіңіздің жемісі. Сіздерге мықты денсаулық, шабыт және қуаныш тілеймін, — деп құттықтады мектеп-лицей директоры Қанат Байсалбаев.
Айта кетсек, Оқу-ағарту министрлігінің мәліметінше, биыл 360 мың бала мектеп табалдырығынан алғаш рет аттап отыр.
Сондай-ақ Оқу-ағарту министрі Ғани Бейсембаев қазақстандықтарды жаңа оқу жылының басталуымен құттықтады.