Елордада әскер қатарына шақырылған жастарды шығарып салу салтанаты өтті

АСТАНА. Мамырдың 6-сы. ҚазАқпарат /Гүлмира Әлиакпарова/ - Бүгін Астанадағы «Жер - Ана» ескерткішінің жанында Ұлы Отан және Ауған соғыстары ардагерлерінің,

тәжік-ауған шекарасында болған әскери іс-қимылдарға қатысушылардың және ҚР Қорғаныс министрлігі өкілдерінің қатысуымен, елорда жастарын әскер қатарына шығарып салу салтанаты өтті, деп хабарлайды ҚазАқпарат. «Нұр Отан» ХДП «Жас Отан» Жастар қанатының Атқарушы хатшысы Нұрлан Өтешевтің айтуынша, «Ер жігіт ел үшін» ұранымен өткен салтанатты іс-шара «Нұр Отан» партиясының алдағы ХІІ съезінің қарсаңында және «Ұрпаққа аманат» республикалық акциясының шеңберінде ұйымдастырылып отыр. Оның мақсаты ? жастардың бойында елге деген патриотизмді нығайту, Қазақстан Республикасының символдарын насихаттау және құрметтеу, ҚР Қарулы Күштеріндегі әскери қызметшілердің имиджін арттыру. Әскер қатарына шақырылған 200 астаналық сарбаздың құрметіне арнайы концерт ұйымдастырылып, соғыс және еңбек ардагерлері, ата-аналар жүрекжарды тілектерін білдірді. ҚР Ұлттық қауіпсіздік комитеті Шекара қызметі директорының орынбасары Амангелді Абылқановтың атап көрсеткеніндей, дәстүрді қайта жандандырып, әскер қатарына жастарымызды осындай патриоттық рухта шығарып салу салтанатын республиканың барлық аймақтарында өткізу керек. «Жастарды майдангерлердің ерліктері негізінде тәрбиелеу қажет, олар әскерде борыштарын өтеу - масылдық емес, абырой екенін түсінулері тиіс», - деді ол.