Полиция келген уақытта бөгде адамдар үшін жабық тұрған коттеджде 6 бойжеткен болған. Олардың массаж салонында интимді қызмет көрсетуді ұсынатыны анықталған.
«Массаж салонының басқарушысы Әкімшілік кодекстің 450-бабы (Көрінеу жезөкшелікпен айналысу немесе жеңгетайлық үшін үй-жайлар ұсыну) бойынша әкімшілік жауапкершілікке тартылып, оған 100 АЕК (277800 теңге) көлемінде айыппұл салынды. Жиналған материал осы кодекстің 425-бабы (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша әкімшілік іс қозғау үшін Есіл аудандық тауарлар мен қызметтердің сапасы және қауіпсіздігін бақылау басқармасына жолданды», - деп хабарлайды департаменттен.
Нұр-Сұлтан қалалық полиция департаменті карантин уақытында жұмысына тыйым салынған орындарға барудың қауіпті екенін ескертеді. Құқық қорғаушылар карантин шараларын сақтау керекігін еске салады.