Елордада «Kóshpendiler Álemi» халықаралық этнофестивалі өтіп жатыр
Этнофестивальге елімізден бөлек, Түркия, Әзербайжан, Болгария, Иран, Оңтүстік Корея, Қырғызстан, Моңғолия және Өзбекстан елдерінің өкілдері қатысуда.
Осымен екінші жыл қатарынан өтіп жатқан айтулы шараның мақсаты - көшпенділердің тарихын және мәдени мұрасын насихаттау, ұлттық салт-дәстүр мен көшпенділер өнерін жаңғырту. Сондай-ақ тарихы көшпенділікпен байланысы бар мемлекеттер арасындағы мәдени қарым-қатынасты нығайту.
«Этнофестиваль республика бойынша осымен төртінші рет, ал елордада екінші жыл қатарынан ұйымдастырылуда. Көшпенділік - бұл біздің өткен тарихымыз. Мақсатымыз - өткенімізді жаңғырту. Бұл біз үшін және болашақ ұрпақ үшін маңызды. Сондай-ақ, аталған шараның тәрбиелік мәні зор. Себебі, бұл жерде ұлттық құндылықтарымыз, дәстүріміз бен өнеріміз дәріптеледі. Сонымен қатар, этнофестивальге шет мемлекеттер өкілдері қатысуда. Бұл өз кезегінде елімізге туристер тартудың бір жолы. Фестиваль қатысушыларына сәттілік тілеймін», - деді ҚР Мәдениет және спорт вице-министрі Елдос Рамазанов.
Оның айтуына қарағанда, елорда тұрғындары мен қонақтары фестиваль барысында көшпенділер шеруі, кәсіби садақшылар жарысы, көкпаршылар мен бүркітшілердің сайысы, жекпе-жек жарысы және шабандоздар өнерін тамашалай алады.
«Фестиваль қонақтарында көшпенділердің өмір салтына, тарихына үңілу мүмкіндіктері бар. Мұнда келген әрбір қонақ этномәдениеттің көпқырлылығын сезініп, халықтың өмірі мен салт-дәстүрлері және көшпенділер тұрмысымен таныса алады. Және де отандық қолөнершілердің шеберлік сабақтары ұйымдастырылады. Атап айтқанда, киіз басу, былғары, күміс және ұршықпен жұмыс істеуді үйрене алады. Одан бөлек, сақ, қаңлы, үйсін және ғұн тайпаларының костюмдер көрсетілімі өтеді», - дейді «Kazakh Tourism» ұлттық компаниясы басқарма төрағасының орынбасары Тимур Дүйсенғалиев.
Шара екі күнге жалғасады.