Елордада лифтіде баланы пышақтаған жасөспірімді ұрғаны рас па – министр жауабы

АСТАНА. KAZINFORM – Денсаулық сақтау министрі Ақмарал Әлназарова қоғамды дүр сілкіндірген оқиғаға қатысты пікір білдірді. 

- Сот-медициналық сараптама жүргізіліп жатыр, оқиға орнына арнайы комиссия барды. Аталған факті расталмады, бірақ әкімшілік бұл жағдайға объективті баға беруге мүдделі. Сондықтан сот-медициналық сараптаманың нәтижесі бойынша қосымша түсінікте береміз, - деді Ақмарал Әлназарова аталған жайтқа қатысты түсінік бере тұрып. 

Министрдің айтуынша, болған жайтқа қатысты алдын ала мәліметтер бойынша факті расталмады. 

Айта кетсек, елордада көпқабатты тұрғын үйлердің бірінде лифтіде баланы пышақтаған жасөспірімнің анасы психикалық денсаулық орталығында ұлын ұрғаны туралы полицияға шағым түсірген еді.

Еске сала кетейік, 11 ақпанда елордада жасөспірім лифті ішінде баланы пышақтап тастаған еді. Кейін белгілі болғандай пышақпен шабуылдаған жасөспірім арнайы есепте тұрған.  

Дәрігерлер зардап шеккен балаға дереу ота жасап, психологиялық көмек көрсетті. 

Қазір баланы пышақтаған жасөспірім психиатриялық стационарда. 

Өз кезегінде Денсаулық сақтау министрінің орынбасары Ержан Нұрлыбаев жасөспірімнің ортаға бейім жағдайда болғанын айтты. 

Сондай-ақ кейін анықталғандай лифтіде баланы пышақтаған жасөспірімді жалғызбасты ана тәрбиелеп отыр.