НҰР-СҰЛТАН. ҚазАқпарат - Елордада Бейбіт Жукаев пен Денис Евсеев Президент кубогы аясында өтіп жатқан ATP Challenger турнирінің ширек финалына шықты, деп хабарлайды ҚазАқпарат тілшісі.
Қазақстан теннис федерациясынан мәлім еткеніндей, Ақтаудан түлеп ұшқан Б.Жукаев екінші айналымда Израиль өкілі Даниэль Цукерманды 6:4, 5:7, 7:6 (7:4) есебімен тізе бүктірді.
Үшінші, шешуші сетте Бейбіт тай-брейкте 0:4 есебімен ұтылып жатып, жеңіске деген жігерін таныта білді.
Б.Жукаев жартылай финалға шығу үшін әлемнің бұрынғы 33-ракеткасы, өзбекстандық Денис Истоминмен таласады.
Алматы теннис мектебінің түлегі Д.Евсеев тартысты матчта жарыстың 6-ракеткасы, ресейлік Евгений Карловскийді жолдан тайдырды - 3:6, 6:2, 6:4.
Д.Евсеев ширек финалда бразилиялық Габриэль Декампспен шеберлік байқасады. Ол қазақстандық Михаил Кукушкинді ұтып кетті.
Әйелдер арасында ITF World Tennis Tour W60 додасында Жібек Құламбаева бастапқы кездесуін израильдық Шавит Кимчимен сәтті өткізді - 6:1, 1:6, 6:3.
Жібектің келесі қарсыласы - оңтүстіккореялық На Ли Хань.
Еске сала кетейік, бұдан бұрын Юлия Путинцеваның Палермо турнирін сәтті бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).