Елордада спорт мектебінің кішкентай тәрбиеленушілері арасында көркем гимнастикадан қалалық біріншілік өтті
Бұл туралы аstana.kz сайтына қалалық Туризм, дене тәрбиесі және спорт басқармасынан мәлім етті.
Алғашқы дайындық топтарында оқитын бүлдіршін қыздар үшін бұл іс-шараның маңызы зор еді. Өйткені, бұл олар қатысып отырған алғашқы біріншілік болатын.
2004 жылы туған кішкентай қыздар арасында турнир жеңімпазы болып Мерейен Кәрібаева танылды. Ал, 2005 жылғылардан Дарья Юкало мен Анеля Болат үздік шықты. Гимнасшылар арасында 2006 жылы дүниеге келген Әмина Төлеуханова мен Виктория Ромашкина жеңіске жетті. Ең кішкентай қатысушылар 2007 жылы дүниеге келген Алина Төлеуханова мен Валерия Лукьянова мектеп жеңімпаздары деп танылды.
«Бұл бүлдіршіндер көркем гимнастикамен тек жарты жылдан бері айналысып келеді. Әзірге затпен өнер көрсету техникасын меңгере қойған жоқ. Алайда, гимнастиканың базалық элементтерін игеруі өте қуантады», - дейді Басқарма қызметкерлері.
Бүгінгі күні астаналық спорт мектебі Қазақстандағы ең үздіктер қатарында көрінуде. Оған мұнда тәрбиеленушілердің республикалық чемпионаттарда бірнеше дүркін жеңімпаз атануы дәлел.