Елордада велосипед ұрлығы көбейді - полиция

АСТАНА. ҚазАқпарат – Жыл басынан бері елордада 106 велосипед ұрлығы тіркелді. Мұны Астана қалалық Полиция департаменті жергілікті полиция басқармасының бастығы Арман Айтмағамбетов айтты, деп хабарлайды ҚазАқпарат тілшісі.

«Жыл басынан Астана қаласының аумағында 106 велосипед ұрланды. Оның ішінде Алматы ауданы бойынша – 36, Есіл ауданы бойынша – 34, Сарыарқа ауданы бойынша – 27, Байқоңыр ауданы бойынша 9 ұрылық тіркелді. Олардың көбі, яғни 47%-ы тұрғын үйлердің подъездерінен, қалғаны үйлердің аулаларынан ұрланған. Оның салдарынан тұрғындарға шамамен 3 млн теңге шығын келтірілді. Ұрланған велосипедтердің орташа құны – 70 мың теңге», - деп мәлім етті Арман Айтмағамбетов БАҚ өкілдерінің қатысуымен өткен баспасөз маслихатында.

Оның айтуынша, өткен жылдың сәйкес кезеңімен салыстырғанда велосипед ұрлығы 2 есе өсті. Былтыр осы аралықта мұндай 48 факті тіркелген болатын.