Елордада World Beauty Astana 2016 фестивалінің гранд-финалы өтіп жатыр
Бүгін қазылар алқасы Қазақстан мен Тәжікстан дизайнерлерінің еңбектеріне өз бағасын берді, деп хабарлайды astana.kz.
Конкурс Астана қаласы әкімдігінің қолдауымен Бейбітшілік және келісім сарайында өтіп жатыр. Оған әлемнің 4-тен 28 жасқа дейінгі 20 мемлекетінен 75 адам және Қазақстаннан 50 дарын қатысады.
Қазылар алқасының мүшесі баронесса Галина де Буард Қазақстанның астанасы мен халқына деген зор ықыласын білдірді.
«Қазақстан мемлекеті, халқы және астанасы өте әдемі. Сіздер үшін бұл әдеттегі жайт болар. Егер сән көрсетілімін өткізетін болсақ, сәнбикелердің 50% осы елден болатыны анық. Қыздар өте сұлу, бұл өте қызық және ерекше», - деді ол.
Байқау жеңімпаздарының есімдері ертең, 5 қарашада сағат 18.00 Бейбітшілік және келісім сарайында өтетін салтанатты шара барысында белгілі болады. Сонымен қатар, көпшілік назарына Пьер Карден Сән үйінің ерлер мен әйелдерге арналған киім жиынтығының көрсетілімі өтеді.
World Beauty сұлулық және сән байқауының негізі 2006 жылы Америкада қаланған. Әлемдік гранд-финалдары АҚШ-та, Италияда, Францияда, Кореяда, ал өткен жылы Вьетнамда ұйымдастырылған. Астанада фестиваль аясында сұлулық пен дарын (қыздар мен жігіттердің арасында) байқауы, сәнбикелер, модельдер, дизайнерлер және визажистер конкурстары өтеді.
Бас жүлде - жобаның әріптесі, танымал кутюрье Пьер Карден ұйымдастыратын Париждегі сән дарындарының фестиваліне қатысуға 4 сертификат, сондай-ақ, Мәскеудегі сән апталығына да сертификаттар бар.