Елордада Жеңіс күніне орай отшашу болды

АСТАНА. KAZINFORM – Екінші дүниежүзілік соғыс жеңісінің 80 жылдығына орай Астана қаласында отшашу болды.

Отшашу сағат 22.00-де екі жерде ұйымдастырылды, яғни Ботаникалық бақта және «Атырау» көпіріне іргелес аумағында атылды. Әр жерде 4 мыңға жуық рет отшашу жарқырады.

Ботаникалық баққа жиналған елорда тұрғындары мен қонақтарының қарасы көп болды. Мерекелік отшашуды тамашалауға астаналықтардың дені отбасымен келген.

Айта кетейік, Жеңіс күніне орайластырылған отшашу демеушілік қаржы есебінен ұйымдастырылды.

Еске салайық, Астанада 7 мамыр – Отан қорғаушылар күні және 9 мамыр – Жеңіс күніне арналған 100-ден астам түрлі іс-шара өтті. Оның ішінде концерттер, ғылыми конференциялар, мектептерде тәрбие сағаттары, театрландырылған қойылымдар тағы сол сияқты іс-шаралар бар.

Бұған дейін елордада Жеңістің 80 жылдығына орай мерекелік отшашу болатынын хабарлаған болатынбыз.

Мемлекет басшысы қазақстандықтарды Жеңіс күнімен құттықтады.

7 мамырда елордадағы «Қазақ Елі» алаңында Мемлекет басшысы — Қазақстан Қарулы Күштерінің Жоғарғы Бас қолбасшысы Қасым-Жомарт Тоқаевтың қатысуымен Жеңістің 80 жылдығына арналған әскери парад өтті.