Елордада жұқпалы ауруға шалдыққан малдың еті сатылып жатқаны жайлы ақпарат — фейк

АСТАНА. KAZINFORM — Мессенджерлер мен әлеуметтік желілерде Астана қаласы «Әлем» сауда орнына сібір жарасы ауруына шалдыққан мал етінің жеткізілгені туралы тараған ақпарат шындыққа жанаспайды. Бұл туралы Ауыл шаруашылығы министрлігі Ветеринариялық бақылау және қадағалау комитеті ресми мәлімдеді.

— Бүгінге дейін елордадағы сауда орталықтарында, соның ішінде «Әлем» сауда орнында жұқпалы ет өнімінің сатылуы немесе жеткізілуі туралы ешқандай факті тіркелген жоқ. Барлық жеткізілген ет өнімі міндетті ветеринарлық-санитарлық тексеруден өтеді. Сондықтан тұрғындардың алаңдауына еш негіз жоқ. Бұған дейін бірен-саран жағдай тіркелген Атбасар ауданында кешенді дезинфекциялық жұмыстар толық аяқталды. Қауіпті ет өнімдері белгіленген санитарлық тәртіппен жойылды. Тұрғындар медициналық тексеруден өтіп жатыр, — делінген хабарламада.

Осы орайда Ветеринариялық бақылау және қадағалау комитеті азаматтарды тек ресми дереккөздерге, яғни Ауыл шаруашылығы министрлігі мен Ветеринариялық бақылау және қадағалау комитетінің ақпараттарына сенуге шақырады.

Сондай-ақ жалған ақпарат тарату Қазақстан Республикасы заңнамасына сәйкес жауапкершілікке әкелетінін ескертеді.

Бірер күн бұрын Ақмола облысында сібір жарасының теріге шығатын түрі тіркелгені туралы хабарлаған едік.