Елордадағы автобус апатының себебі белгілі болды
АСТАНА. KAZINFORM — Елордада апатты болған қызметтік автобустың жүргізушісі рөлге ие бола алмай қалған.
— Mercedes маркалы қызметтік автобустың жүргізушісі Қабанбай батыр даңғылымен жүріп келе жатып, бұрылыс жасау кезінде рөлге ие бола алмай, көлік жол жиегіне шығып кеткен. Салонда болған жолаушылар медициналық мекемеге жеткізілді. Жол-көлік оқиғасы салдарынан қаза болғандар жоқ. Аталған дерек бойынша тексеріс жүргізіліп жатыр, — делінген қалалық Полиция департаментінің Kazinform агенттігіне берген жауабында.
Айта кетейік, тараған видеоға қарағанда, автобус қалалық маршрутта жүрген көлікке ұқсамайды.
Елордалық денсаулық сақтау басқармасы аталған жол-көлік оқиғасы салдарынан 14 адам жедел жәрдем арқылы қалалық көпсалалы стационарларға, сондай-ақ Ұлттық шұғыл медицина үйлестіру орталығына жеткізілгенін хабарлады. Зардап шеккендердің бірқатары амбулаторлық емдеуге жіберілді, ал қалғандары қосымша тексеруден өтіп жатыр. Зардап шеккендердің басым бөлігі жеңіл түрде жараланған.