Елордадағы дәмханада уланғандар саны 20-ға жетті: тергеу жүріп жатыр

АСТАНА. KAZINFORM — Кеше елордадағы «Көктем» дәмханасынан ас ішкен адамдардың ішек инфекциясынан жаппай улану жағдайы тіркелді.

Бұл туралы Астана қаласы Санитариялық-эпидемиологиялық бақылау департаменті басшысының орынбасары Жанна Пралиева мәлім етті.

— Бүгінде астан уланғандар саны 20 адамға жетті, оның 11-і бала. Аталған факті бойынша дәмханада эпидемиологиялық тергеп-тексеру жұмыстары басталды. Зертханалық зерттеулерге тағам өнімдері, сыртқы ортадан алынған жұғындылар, сондай-ақ қызметкерлер тексерілді, — деді Жанна Пралиева.

Қазір зертханалық сынақ нәтижелері әзірленіп жатыр. 

— Тергеу және эпидемияға қарсы іс-шаралар жалғасып жатыр. Сондай-ақ, жаппай улану жағдайының тіркелуіне байланысты полиция басқармасы тарапынан сотқа дейінгі тергеп-тексеру басталды, — дейді ол.

Бұған дейін елордада «Көктем» дәмханасының асынан он адам уланғаны туралы жазған едік. Қазір олардың жағдайы — орташа ауыр. 

Еске салсақ, өткен жылы СҚО-да бір отбасы астан уланып, 2 бала қайтыс болды. 

Жыл басында Маңғыстау облысына қарасты Қызылсай ауылында балабақшада балалар астан уланды. 

Сондай-ақ Түркістанда суши жеген 22 тұрғын уланып қалғаны туралы жазған едік.