Бұрын жинақтың тек жартысын ғана жеке басқаруға беруге болатын. Енді салымшы өз ақшасын 100% жеке компанияға аудара алады.
Ең басты қорқыныш «ақшамды жеке компанияға берсем, үй алуға немесе емделуге шекті деңгейден асқан ақшамды пайдалана алмай қаламын ба?» деген сұрақ еді.
Енді бұл кедергі жойылады. Жеке компаниядағы ақша да Ұлттық банктегідей тең дәрежеде есептеледі.
Сондай-ақ жаңа «мультипортфель» жүйесі енгізіледі. Жастар өз ақшасының 80%-на дейін табысы жоғары акцияларға салып, жинағын тез көбейтуге мүмкіндік алады.
Ал зейнетке жақындағандар үшін тәуекелі аз, сенімді портфельдер ұсынылады.
- Біз салымшының өз ақшасын еркін басқаруына мүмкіндік бергіміз келеді. Ол Ұлттық банк пен жеке компания арасында таңдау жасағанда, бұл оның жинағының бір бөлігін үй алуға немесе емделуге пайдалану құқығына әсер етпеуі тиіс. Бұл зейнетақы активтерін басқарудағы мемлекеттік монополияны жоюға жол ашады, - деді Нұржан Тұрсынханов.
Айта кетейік, бұған дейін зейнетақы жинағын мерзімінен бұрын алу талабы қатаңдатылатынын жазған едік.