ЕО климаттық тұрақтылық пен су қауіпсіздігін арттыру жобаларына 86 млн еуро инвестиция салмақ

АСТАНА. KAZINFORM — қаржыландыру 2023 жылғы байқау аясында іріктелген жобаларға беріледі. Олар Дания, Эстония, Польша, Словения және Исландияда жүзеге асырылады.

AZƏRTAC хабарлағандай, бұл туралы ақпарат Еуропалық комиссияның ресми сайтында жарияланды.

Еуропалық Одақ ластанған өзендерді тазарту, су сапасы мен қолжетімділігін жақсарту, өрт пен су тасқынынан қорғанысты күшейту, сондай-ақ парниктік газдар шығарындыларын азайтуға бағытталған жаңа стратегиялық біріктірілген жобаларды жүзеге асыруға 86 миллион еуро бөледі.

Бұл жобалар ұлттық, өңірлік және жергілікті билік органдарына ЕО-ның экологиялық және климаттық заңнамасын іске асыруға көмектеседі.

Еурокомиссия бұл бастамалар ЕО-ның басқа қаржыландыру көздерінен қосымша инвестициялар тартуға ықпал етеді деп болжап отыр. 

Олардың қатарына ауыл шаруашылығы, құрылымдық, өңірлік және зерттеу қорлары, сондай-ақ ұлттық қорлар мен жеке сектор инвестициялары кіреді.

Айта кетелік Еуропалық Одақ АҚШ-тан энергетикалық ресурстар сатып алуға міндетті болады.