«Батыр шапағаты» белгісінің идеялық негізі 1993 жылғы «Мемлекеттік наградалар туралы» заңмен сабақтасып, жалпы мемлекеттік марапаттау мәдениетімен қатар дамып келеді. Бұл белгі жыл сайын отан алдындағы сіңірген еңбегімен ерекшеленген азаматтарға беріледі. Мұндай еңбектің ауқымы кең – кәсіпкерлік саласындағы тұрақты жұмыс, қоғамдық және әлеуметтік бастамалар, өндіріс пен экономикадағы нәтижелі жобалар, жаңашыл идеялар мен инновациялық ізденістер, сондай-ақ патриоттық бағыттағы нақты қызмет түрлері қамтылады.
Биылғы рәсімде елге еңбегі сіңген бірқатар тұлға марапатталды. Олардың қатарында экономика және бизнес саласындағы белгілі тұлғалар да, технологиялық жаңашылдықты дамытқан кәсіпкерлер де, әлеуметтік салаға қолдау көрсеткен қоғамдық белсенділер де бар.
Аталған рәсімде кәсіпкерлікпен қатар өндіріс пен әлеуметтік салаға серпін берген тұлғалар да назардан тыс қалмады. Райымбек Баталовтың еңбегі тамақ өнеркәсібін дамытуға қосқан үлесімен, отандық брендтердің қалыптасуына ықпал еткен жұмысымен және соғыс пен еңбек ардагерлерін қолдауға бағытталған бастамаларымен сипатталды. Кенес Рақышевтің қызметі жоғары технологиялар, IT және финтех салаларындағы жобалармен, стартаптарға инвестиция салу арқылы жаңа жұмыс орындарын қалыптастыруымен және әлеуметтік жобаларды қолдауымен бағаланды. Бұдан бөлек, медиа саласы арқылы кәсіпкерлік мәдениетті кеңінен насихаттаған Арманжан Байтасовтың еңбегі де атап өтілді. Ол Forbes Kazakhstan арқылы бизнес тақырыбын кең көлемде жариялаудың нәтижесінде кәсіпкерліктің қоғамдық беделіне ықпал еткен тұлғалардың бірі.
Сондай-ақ марапат иегерлері қатарында Раис Агаевтың есімі де аталады. Ол «FAVORIT» компаниясының негізін қалаушы кәсіпкер ретінде бизнестің дамуына, кәсіби даярлық пен кадрлық жаңаруға үлес қосқан, корпоративтік әлеуметтік жауапкершілікті жүйелі деңгейде дамытуға тырысқан тұлға ретінде сипатталады. Компанияның автонарықта инновациялық шешімдер енгізуі, жас мамандарға мүмкіндік беруі еңбек нарығында жаңа тәжірибені қалыптастыруға ықпал еткенімен ерекшеленеді. Сонымен бірге қоғамдық салада өңірлік даму, әлеуметтік-экономикалық жобалар арқылы қоғамдастықтарды қолдаған Досымбек Бегалиевтің қызметі де осы марапаттың әлеуметтік бағытын көрсететін мысал ретінде беріледі.
Бұл марапаттың ерекшелігі – оны тағайындау рәсімінің қатаңдығы. Процедура әділдікті қамтамасыз етуге бағытталған. Алдымен үміткерді ұсыну жүреді: ұйым немесе еңбек ұжымы кемінде бес жылдық қызмет нәтижелерін дәлелдейтін құжаттарды жинап, кандидатураны ресми түрде ұсынады. Одан кейін Ардагерлер қауымдастығының комитеті келіп түскен материалдарды қарап, еңбектің қоғамдық салмағын, жаңашылдығын, маңызын жан-жақты бағалайды.
Шешім қабылданғаннан кейін марапат ресми жиында табысталады. Әдетте жыл сайын әр сала бойынша 10-15 азамат марапатқа ие болады. 2023 жылғы марапаттау кезінде де ұйымдастырушылар бұл белгінің ең алдымен патриоттық мәнін атап өтіп, қоғамдық бірлік пен ұлттық құндылықтарды нығайтудағы рөлін көрсеткен.
Жалпы, «Батыр шапағаты» белгісінің қоғамдық салмағы тек салтанатпен өлшенбейді. Оның негізгі ықпалы – елге қызмет етудің нақты әрекет арқылы бағаланатынын қоғам санасына орнықтыру. Мұндай марапаттау тәжірибесі еңбек мәдениетін көтеріп, белсенді азаматтық позицияны ынталандырады. Нәтижесінде кәсіпкерлік бастамаларға, инновациялық жобаларға және әлеуметтік жауапкершілікке деген сұраныс артады. Бұл өз кезегінде мемлекеттік деңгейде инвестициялық тартымдылықты күшейтуге, Қазақстанның халықаралық беделін нығайтуға және азаматтардың елдік жауапкершілік сезімін арттыруға ықпал етеді.
Дәуіржан Санжарұлы