Бұл шара Қазақстанның барлық өңірлерінен ерекше білім беру қажеттіліктері бар дарынды балаларға қолдау көрсетуді, шығармашылық бағытта дамытуды мақсат етеді. Жоба балалар жылы аясында жүзеге асып отыр.
Гала-концертке қатысқан балаларды Мәдениет және спорт министрі Дәурен Абаев құттықтап, инклюзивті білім беру мен қоғамды дамытуда мұндай жобаның маңызы зор екенін атап өтті. Еліміздегі ерекше балалардың өнерін ұштауға бағытталған фестиваль республикамыздың әр аймағындағы дарынды жастардың басын қосады.
«Өнер – адамның жанын ғана емдемейді, оның тәніне де тірек болады. Балалардың талантын ашуда мұндай алаңдар қашанда қажет. Сондықтан осы жобана жүзеге асыруға атсалысқан азаматтардың барлығына алғыс айтамын. Сіздер балаларды бақытты, ал қоғамды мейірімді етуге үлес қосып отырсыздар», - деді Дәурен Абаев.
Гала-концертте Роза Рымбаева, Айжан Нұрмағамбетова, Құрмаш Махан, Салтанат Меңдіғалиева, Әлібек Әлмадиев, Рухия Байдукенова, Дидар Абдухалық, Гүлдана Акимова (флейта) сынды танымал әртістер, «Астана сазы» мемлекеттік фольклорлық ансамблі, «Меломен» тобы, Turan фольклорлық-этнографиялық ансамблі, Forte Trio және Saz&Soul шығармашылық ұжымдары балалармен бірге өнер көрсетті. Мұны фестивальдің ерекшеліктерінің бірі ретінде атап өтсек болады.