НҰР-СҰЛТАН. ҚазАқпарат – Алматыда күрес түрлерінен өтіп жатқан Азия чемпионатында еркін күрес шеберлері табысты өнер көрсетуде, деп хабарлайды ҚазАқпарат тілшісі.
Нұрқожа Қайпанов 74 келі салмақта финалда ирандық Мустафа Хоссейнханимен белдесті.
М.Хоссейнхани – Азия чемпионы, әлем біріншілігінің қола жүлдегері атанған тәжірибелі балуан. Ол алғашқы үш минутта 2:0 есебімен алға шықты. Дегенмен содан кейін күш-қайратына мінген Н.Қайпанов 6:2 есебімен жеңісті жұлып алды.
Осылайша ол еркін күрестен Қазақстан қоржынына екінші алтын медальді салды.
Еске сала кетейік, Нұрқожа Қайпанов 2019 жылы Қытайда өткен Азия чемпионатында да топ жарған болатын. Былтырғы маусымнан бастап Нұрқожа олимпиадалық салмаққа ауысты.
Тағы бір қазақстандық, жас балуан Адлан Асқар 61 кг салмақта соңғы белдесуде өзбекстандық Джахонгирмирза Туробовқа есе жіберіп, күміс жүлдегер атанды.
Бүгін сондай-ақ Олег Болтин 125 кг салмақта алтын жүлде үшін таласады.
Еске сала кетейік, бұдан бұрын Талғат Сырбаз Азия чемпионы атанған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).