Кітаптың тұсаукесеріне Нұрғиса Тілендиевтің жары Дариға Тілендікеліні, Қалижан Бекхожиннің зайыбы Зайда Жанайқызы, Төлеген Айбергеновтың қызы Салтанат Айбергенова және тағы да басқа кітаптың басты кейіпкерлері болған тұлғалардың туған-туыстары мен жұбайлары, сондай-ақ, елімізге танымал ақын-жазушылар, университет оқытушылары мен студенттері қатысты.
«Бұл кітап қазақ руханиятында ерекше орынға ие болары сөзсіз. Кітап ішіндегі жазбалар бірін-бірі қайталамайды. Бұл кітап кешегі 50-60-шы жылдары қазақ рухани әлемінде жарқ етіп көрінген алыптарымыздың өмірбаяндарынан нақты естеліктер береді. Кітап сонысымен құнды»,- деп атап өтті тұсаукесер барысында әл-Фараби атындағы ҚазҰУ филолоия, әдебиеттану және әлем тілдері факультетінің деканы, профессор Қансейіт Әбдезұлы.
Кітаптың шығуына мұрындық болған «Атамұра» корпорациясының президенті, Қазақстанның еңбек сіңірген қайраткері Рақымғали Құл-Мұхаммедтің айтуынша: "Кітап Қалижан Бекхожин, Нұрғиса Тілендиев, Тәкен Әлімқұлов, Жарасқан Әбдіраш, Бексейіт Түлкиев сияқты қазақтың бірнеше көрнекті ақын-жазушылары мен әнші-сазгерлерінің, суретшілер мен спорт шеберлерінің сондай-ақ, өнер қайраткерлерінің артында қалған аяулы жарлары өздерінің өмірлік серігі болған жұбайлары туралы сыр шертуімен ерекше. Бізге бұл туынды сол аға буынның артықшылығын, жақсы қасиеттерін баяндайды",-деді.
Ел Тәуелсіздігінің 20 жылдық мерекесіне орай «Атамұра» баспасынан жарық көрген бұл жинақта қаламгердің 2004-2011 жылдар аралығында «Айқын» газетінде «Аққудың сыңары», «Жақсының көзі» айдарлары бойынша жарық көрген сыр-сұхбаттары мен мақалалары топтастырылған.