Теміртау қаласындағы сумен қамтуға қатысты тұрғындардың наразылықтары әлеуметтік желілілерде де, БАҚ-да да күн сайын артып келеді. Билік өкілдері бұл мәселені шешу жолдарын қарастырып, жұмыс жасап жатқандарын айтады.
Айта кету керек, Қарағанды – Теміртау су құбыры 1981 жылы пайдалануға берілген. Оның тозуы шамамен 90% құрайды. Қазір қаланың кейбір орталық аудандарының тұрғындары кесте бойынша су алады. Жағдайды тұрақтандыру үшін биыл су құбырының апаттық учаскелері зерттелді – шамамен 5 км болды.
«Теміртау үш көзден сумен қамтамасыз етіледі, оның негізгісі – Қарағанды – Теміртау су құбыры. Бүгінгі таңда ол өзінің нормативтік қызмет мерзімінен екі рет асып түскен. Күрделі жөндеу мүлдем болмаған. Біз инженерлік желілердің жағдайына байланысты сумен жабдықтау тапшылығын жаба алмаймыз, сондықтан шектеулер енгізіп, кесте бойынша су беруге мәжбүрміз. Шағымдар өте көп. Қала тұрғындарына жағдайдың себептері туралы хабарлау қажет. Ешкім қол қусырып отырған жоқ. Жұмыс істеп жатырмыз», – деп түсіндірді қала әкімі Ораз Тәуірбеков.
Қазір конкурстық рәсімдер аяқталуда. Егер бәрі ойдағыдай болса, тамыздың бірінші онкүндігінде су құбырындағы негізгі жұмыстар басталады. Бірақ «Оқжетпес-Т» ЖШС мердігерді күтпей, апатты учаскелерді өз күшімен ауыстыруға кірісіп кеткен.
«Биыл біз негізгі жұмыстарды тамыз және қыркүйек айларында орындайтын боламыз. Біз қалаға судың келуін тұрақтандырамыз және кесте бойынша су беруден арылуға тырысамыз. Мәселені толығымен шешу үшін қалған 22 км қайта құру арқылы қалпына келтіреміз. Енді біз жобалаушымен келісімшарт жасасамыз, содан кейін ол жобалық жұмыстарға кірісуі керек. Жобада айдау станциясын да қарастыру қажет», – деп атап өтті Теміртау әкімі.
Әр жылдары апаттық ақауларды жою тәртібімен жөндеу үшін қолда бар материалдар қолданылды, ал қазір су құбырлары әртүрлі материалдар мен диаметрлерден жасалған – бұл темірбетон, болат және шойын. Мұның бәрін нормативке сай келтіру керек.