Еуроодақ халқы қатарынан төртінші жыл өсіп келеді

АСТАНА. KAZINFORM — 2025 жылдың 1 қаңтарындағы жағдай бойынша Еуропалық Одақтың (ЕО) халқы 450,4 миллион адамға жетті. Бұл бір жыл бұрынғы көрсеткішпен салыстырғанда 1 070 702 адамға артық. Осылайша, COVID-19 пандемиясының салдарынан 2021 жылы орын алған халық санының азаюынан кейін, ЕО халқы қатарынан төртінші жыл өсіп отыр, деп хабарлайды Kazinform агенттігінің меншікті тілшісі.

Халық санының артуы көбіне пандемиядан кейін күшейген көші-қон ағындарымен түсіндіріледі.

2012 жылдан бастап ЕО елдерінде табиғи өсім теріс мәнге ие болды (яғни қайтыс болғандар саны туылғандар санынан асып түсті), алайда көші-қон есебінен бұл орнын толтырып отыр.

Бұл ақпарат бүгін Eurostat (Еуростат) жариялаған халық саны туралы деректерге негізделген.

Ауқымдырақ қарағанда, 1960 жылы 354,5 миллион болған ЕО халқы 2025 жылдың 1 қаңтарына қарай 450,4 миллионға жетіп, 95,9 миллион адамға артты.

Соңғы онжылдықтарда халық санының өсу қарқыны біртіндеп баяулады: 2005 жылдан 2024 жылға дейін ЕО халқы жыл сайын орта есеппен 0,9 миллион адамға артса, ал 1960 жылдары бұл көрсеткіш жылына шамамен 3 миллион адам болған.

2025 жылдың 1 қаңтарындағы жағдай бойынша ЕО елдерінің халқы Германияда – 83,6 миллионнан бастап, Мальтада – 0,6 миллион адамға дейін құбылады. Германия (ЕО халқының 19%-ы), Франция (15%) және Италия (13%) ЕО-дағы ең тығыз қоныстанған елдер болып табылады. Бұл үш мемлекет 2025 жылдың басындағы ЕО халқының жалпы санының шамамен 47%-ын құрады.

2024 жылдың 1 қаңтарынан 2025 жылдың 1 қаңтарына дейінгі аралықта ЕО-ның 8 елінде халық саны азайған. Ең көп қысқару Латвияда тіркелді (халық санының өзгеру коэффициенті −9,9 адам / 1000 тұрғын), одан кейін Мажарстан (−4,7), Польша және Эстония (−3,4).

Халық саны өсу қарқыны бойынша алдыңғы қатарда тұрған 19 ЕО елі ішінде Мальта көш бастады (+19,0 / 1000 тұрғын), одан кейін Ирландия (+16,3) және Люксембург (+14,7). 

Айта кетелік 1 маусымдағы көрсеткішке сай Қазақстан халқының саны 20 370 672 адамға жеткен.