Еуропалық одақ Қазақстандағы демократияны дамытуға 3 млн еуро бөліп отыр

АСТАНА. ҚазАқпарат - Бүгін Еуропалық одақтың Астанадағы кеңсесінде демократия мен азаматтық қоғамды дамытуды көздейтін бірқатар жобалар рәсімделді. Аталған жобаларды үкіметтік емес ұйымдар іске асырады. Ал Еуроодақ соның бәріне 3,7 млн еуроның 85 пайызын бөліп отыр, деп xабарлайды ҚазАқпарат тілшісі.

Еуропалық одақтың елшісі Траян Христеаның айтуынша, осыдан үш жыл бұрын Қазақстан орташа табысы бар мемлекеттер санатына қосылғаннан кейін қаржылай қолдау шаралары тоқтатылған еді. Алайда 2014-2020 жылдарға арналған Орталық Азия бойынша аймақтық бағдарламасы аясындағы ынтымақтатық жалғаса береді. «Мәселен, қазіргі кезде Еуропалық одақтың Қазақстандағы өкілдігі «жасыл» экономикаға арналған бірқатар жобаларды іске асыруда. Оған 7,1 млн еуро бөлінді. Сондай-ақ сот реформасын қолдау шараларына 12 млн еуро берілген еді», - дейді Христеа мырза.

Жаңа тоғыз жобаның ішінде де сот реформасын қолдау шаралары қарастырылған. Бұдан бөлек, жергілікті өзін-өзі басқару институтын нығайту, демократия мен адам құқықтарын қорғау сияқты мақсат-міндеттер бар. Түптің-түбінде xалықтың саяси-экономикалық белсенділігін көтеріп, елдің әл-ауқатын көтеру көзделген. Осыған орай, ауылды жерлерде бірқатар бастамаларды іске асыру жоспарланып отыр.