«EXPO 2017 Football Cup»: Қазақстан футболшылары Германияны тізе бүктірді
Алғашқы ойында қазақстандық футболшылар германиялық футбол ардагерлерінен 8:6 есебімен басым түсті, деп хабарлайды «ҚазАқпарат» ХАА тілшісі.
Турнирдегі матч 20 минуттық екі таймнан тұрады. Арасында 5 минут тынығып алатын футболшылар «Астана Арена» стадионының көркін қыздырып-ақ тұр. Алғашқы матчты сағат 12:00 уақытында Қазақстан мен Германия құрамалары бастап кетті. Бірінші таймда қазақстандықтар 3:2 есебімен қарсыластарынан басым түсті. Біздің команда үшін екі голды Мұрат Тілешев, бір голды Қайрат Әубәкіров салды.
Екінші тайм да қос тарап үшін тартысты басталды. Бір қуанарлығы, қазақстандық ардагер футболшылар көрерменін жерге қаратып жатқан жоқ. Екінші таймның бірінші минутында да Андрей Финонченконың дөп тепкен добы немістердің қақпасын дәл тапты. 27 минуттың соңында Мұрат Тілешев тағы бір гол соқса, 31 минутта германиялық Томас Бридарик ерекше көзге түсіп, командасының қоржынын бір голмен толықтырды. 33 және 35 минутта Андрей Богомолов Қазақстанның 6-шы және 7-ші голын салды. 39 минутта германиялықтар есепті 7:6-ке жеткізгенімен, есепті теңестіре алмады. Бұл уақытта Қазақстаннан Алексей Клишин тағы бір гол салып жіберген еді.
Еске сала кетсек, бүгін Астанада «ЭКСПО-2017» халықаралық көрмесі аясында әлемдік футбол жұлдыздарының қатысуымен «EXPO 2017 Football Cup» турнирі басталды. Турнирге Қазақстан, Ресей, Ресей, Италия, Германия, Португалия құрама командалары мен әлем құрамасы қатысуда. Қазақстан мен Германия құрамаларының ойынынан кейін турнирдегі екінші матчты Ресей мен Италия құрамалары өткізеді.