Филиппиндегі тропикалық дауылдан қаза тапқандар саны 48-ге жетті

МАНИЛА. KAZINFORM – Филиппиндегі Батчой және Карина тропикалық дауылдары салдарынан болған су тасқыны мен көшкіннен қаза тапқандар саны 48-ге жетті. Бұл туралы Анадолы хабарлады. 

Филиппиннің табиғи апаттар қаупін азайту және басқару жөніндегі ұлттық кеңесіне сілтеме жасаған PNA агенттігінің хабарлауынша, тропикалық дауылдардан 6,2 миллион адам зардап шеккен және барлығы 8 574 ғимарат зақымданған.

Сондай-ақ, 36 мыңға жуық адам эвакуациялық орталықтарға орналастырылған.

Шілде айында Филиппинді соққан тропикалық циклондар елде шамадан тыс жауын-шашын, су тасқыны мен көшкіндерді тудырды.

118 провинция мен ауданда төтенше жағдай жарияланды.

Бұған дейін Үндістандағы көшкін құрбандарының саны 358 адамға жеткені туралы жазған болатынбыз.