15:02, 23 Мамыр 2023

FlyArystan компаниясының ұшып келе жатқан екі әуе кемесіне құстар соғылды

АСТАНА. ҚазАқпарат – Қазақстандағы лоукостер FlyArystan компаниясының ұшып келе жатқан екі әуе кемесіне құстар соғылды. Бұл ұшақтар Түркістан – Астана және Қостанай – Астана бағыты бойынша сапарға шыққан, деп хабарлайды ҚазАқпарат тілшісі.

Бұл ақпаратты әуе компаниясының байланыс орталығы растады. FlyArystan өкілдері осы оқиға салдарынан Астана – Қостанай және Қостанай – Шымкент бағыты бойынша басқа рейстер кейінге шегерілгенін хабарлады. Ұшақтардың шығу уақыты сағат 18:15-ке және 20:00-ге ауыстырылды.

«Билет құны толық қайтарылады немесе басқа күнге қайтадан билет алуға болады. Бұл жұмыстар ақысыз іске асырылады», - делінген FlyArystan байланыс орталығы мәліметінде.

Жақында FlyArystan ұшағына найзағай түсіп, әуе кемесі шұғыл түрде қонуға мәжбүр болды.

Оқиға Ұшақ

Руслан Ғаббасов

Ақмола облысының Біржан сал ауданында дүниеге келген. Л.Н. Гумилев атындағы Еуразия ұлттық университетінің журналистика факультетін бітірген. 2005 жылдан бері «ҚазАқпарат» халықаралық ақпарат агенттігінде жұмыс істеп келеді.