Франциядағы наразылық шеруі: Қала көшелерінде тәртіп орнату үшін 40 мың полиция қызметкері жұмылдырылады

Париж бен оның шеткі аумағында 5000 полиция қызметкері көше тәртібін қадағалайды.

Елдің бас шаһарында автобус жергілікті уақытпен кешкі 21:00-де жұмысын тоқтататын болды. Билік мұны қоғамдық көліктің жұмысына жауапты кәсіпорындар мен жолаушылардың қауіпсіздігін қамтамасыз ету үшін істеп отырғанын айтты.

Кламардағы коменданттық сағат

Ел астанасынан оңтүстік -батысқа қарай 10 км қашықтықта орналасқан Кламар қаласында коменданттық сағат енгізілді. Ол 29 маусым мен 3 шілде аралығында 21:00-ден таңғы 06:00-ге дейін күшінде болады.

Жаппа йтәртіпсіздік бұл елдімекенді де айналып өтпеді, өткен түнде мұнда трамвай өртелді.

150 адам ұсталды

Наразылық Нантер қаласында 17 жастағы жасөспірім көлік жүргізіп келе жатып, тәртіп сақшыларының тоқта деген бұйрығын елемеген соң, полиция қызметкерлері оны атып өлтіруінен кейін туған.

Оқиға орнына жедел жеткен дәрігерлер жасөспірімнің өмірін құтқарып қала алмады. Құқық қорғау органдары оқиғаның мән-жайын анықтау үшін тергеуді бастап кетті.

Оқиғаның видеосы әлеуметтік желіге тарап кеткен. Сол күні-ақ Париж маңында наразылық акциясы өтіп, кейін басқа қалаларға да тарады. 29 маусым күнгі таңдағы дерек бойынша, шеруге шыққан 150 адам ұсталған.
Жасөспірімге оқ атты деген күдікпен полиция қызметкері қамауға алынды. Оған қасақана кісі өлтірді деген айып тағылып отыр.