Француз оппозициясының жетекшісі Марин Ле Пенге қатысты сот процесі басталды

АСТАНА. KAZINFORM – Франциядағы «Ұлттық бірлестік» ірі партиясының жетекшісі Марин Ле Пен және басқа 26 адам, оның ішінде Францияның қазіргі және бұрынғы заң шығарушылары мен Еуропарламент депутаттары Еуропарламент қаржысын жымқырды деп айыпталуда, деп хабарлайды жергілікті БАҚ.

Болжалды схемалар 2004 және 2016 жылдар аралығында жасалуы мүмкін, деп жазды Politico басылымы. 

Марин Ле Пеннің өзі заңсыздыққа қатысы барын бірнеше рет жоққа шығарды. 

Сауалнамалар француз ультра оңшыл көшбасшысы Марин Ле Пеннің президенттік сайлауда жеңіске жетуге бұрынғыдан да жақын екенін көрсетті.

Алайда соттың істі қарауы М.Ле Пенді 2027 жылы президенттік сайлауға түсу мүмкіндігінен айыруы мүмкін. 

Егер ол екі айға созылған сот талқылауынан кейін кінәлі деп танылса, 10 жылға бас бостандығынан айырылып, 1 млн еуроға дейін айыппұл төлейді. Осындай мерзім түрмеде отыру екіталай болғанымен, оған мемлекеттік қызметке қатысуға бес жылға тыйым салына алады. 

Прокурорлар өз мәлімдемесінде Еуропарламент ақпаратына сүйеніп, «Ұлттық бірлестік» партиясында негізгі қызметтерді атқарған депутат көмекшілеріне жылына миллиондаған еуро жұмсағанын білгенін хабарлады. 

«Еуропалық парламенттің заңгерлері бұл жағдайда парламент қаржылық шығынға ұшырап, сонымен қатар беделіне нұқсан келтірді деп есептейді», - делінген парламенттің баспасөз қызметі Politico газетіне берген мәлімдемесінде. 

Іске француз оңшыл күштерінің басқа да көрнекті қайраткерлері, соның ішінде партияның негізін қалаушы және Мариннің әкесі Жан-Мари Ле Пен, сондай-ақ Францияның оңтүстігіндегі Перпиньян қаласының мэрі Луи Алио және Марин Ле Пеннің бұрынғы азаматтық серіктесі сияқты басқа да шенеуніктердің қатысы бар.