НҰР-СҰЛТАН. ҚазАқпарат – Қазақстандық Юлия Галышева фристайл-могулдан Алматыда әлем чемпионатының күміс жүлдегері атанды, деп хабарлайды ҚазАқпарат тілшісі.
Шымбұлақтағы дүниежүзілік додада Ю.Галышева негізгі финалға 82.54 ұпай жинап, үздік көрсеткішпен өткен болатын.
Ең үздік алты спортшы қатысқан соңғы сында Ю.Галышева 79.52 ұпаймен екінші орынға көтерілді.
Чемпиондық атақ олимпиада жеңімпазы, франциялық Перрин Лаффонға бұйырды. Ол 82.11 ұпайға ие болды. Ресейлік Анастасия Смирнова 79.41 ұпаймен үздік үштікті түйіндеді.
Бұдан бұрын, 2019 жылы АҚШ-та өткен әлем біріншілігінде Ю.Галышева жеңімпаз атанған еді. Енді күміс жүлде бұйырып отыр.
Ерлер арасында негізгі финалға Қазақстаннан Павел Колмаков пен Дмитрий Рейхерд өтті. 82.23 ұпай жинаған П.Колмаков өз спорттық жолында алғаш рет әлем чемпионатының қола жүлдегері атанды. Канадалық Микаэль Кингсбери чемпион атанса, күміс медаль франциялық Бенджамен Каветтің қанжығасында кетті. Д.Рейхерд 78.47 ұпаймен бесінші орында қалып қойды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).