ОРАЛ. ҚазАқпарат - Бүгін ел біріншілігінің жетінші турында Оралдың "Ақжайығы" өз алаңында Қарағандының "Шахтерін" қабылдады, деп хабарлайды ҚазАқпарат тілшісі.
Ақсай қаласындағы "Қарашығанақ" стадионында алдымен алаң иелері есеп ашты. 26-минутта Берік Шаихов қақпа бұрышын дәл көздеді. Сөйтіп ол "Ақжайық" сапындағы алғашқы голын соқты. Қонақтар таразы басын теңестіруге тырысып бақты.
Екінші таймда "Шахтерден" Александр Володько мергендігімен көзге түсті.
Бүгін Батыс Қазақстанда соққан күшті жел ойыншыларға да кедергі келтірді.
Осылайша қос команда 1:1 есебімен тең тарқасты.
Турнир кестесінде "Шахтер" мен "Ақжайық" сәйкесінше 10 және 9 ұпаймен бесінші, алтыншы орында келеді.
Еске сала кетейік, батысқазақстандықтар өткен турда Қостанайдың "Тобылымен" 1:1 есебімен тең ойнаған болатын. Оралдықтар келесі кездесуін 5 мамыр күні Петропавлда жергілікті "Қызылжармен" өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).